🔴 कणकवली नाभिक संघटनेची कार्यकारिणी सभा उत्साहात

🔴 कणकवली नाभिक संघटनेची कार्यकारिणी सभा उत्साहात

🔹गुणवंत विद्यार्थ्यांचा सत्कार आणि नवीन कार्यकारिणी निवडीवर चर्चा

कणकवली: (प्रतिनिधी) कणकवली तालुका नाभिक संघटनेची कार्यकारिणी सहविचार सभा सोमवार, ११ ऑगस्ट २०२५ रोजी माजी जिल्हाध्यक्ष अनिल अणावकर यांच्या निवासस्थानी उत्साहात पार पडली. ११ ऑगस्ट हा ‘राष्ट्रीय सलून दिवस’ म्हणूनही साजरा करण्यात आला. या सभेत संत सेना महाराजांच्या पुण्यतिथीचे नियोजन, गुणवंत विद्यार्थ्यांचा सत्कार आणि नवीन कार्यकारिणीची निवड यांसारख्या महत्त्वाच्या विषयांवर चर्चा झाली.

          सभेच्या सुरुवातीला तालुका सरचिटणीस प्रवीण कुबल यांनी उपस्थितांचे स्वागत केले आणि सभेचे प्रास्ताविक मांडले. २० ऑगस्ट रोजी संत सेना महाराजांची पुण्यतिथी परमहंस भालचंद्र महाराज संस्थान भक्त निवास येथे साजरी करण्याचे निश्चित करण्यात आले आहे. या कार्यक्रमात दहावी आणि बारावीच्या परीक्षेत यश मिळवलेल्या नाभिक समाजातील विद्यार्थ्यांचा सत्कार करण्यात येणार आहे.

          या वर्षी दहावी उत्तीर्ण झालेल्या विद्यार्थ्यांमध्ये श्रेया चव्हाण (कलमठ), तातोबा चव्हाण (ओसरगाव), गौरी चव्हाण (सातरल), हिमांश चव्हाण (जानवली), निखिल चव्हाण (नाटळ), प्रदिप्ती कुबल (कणकवली), साक्षी चव्हाण (जानवली), श्रावणी चव्हाण (कनेडी), किर्ती राज चव्हाण (नाटळ), आणि यश चव्हाण (ओसरगाव) यांचा समावेश आहे. बारावी उत्तीर्ण विद्यार्थ्यांमध्ये चंदना चव्हाण (शिडवणे), आर्यन चव्हाण (शिडवणे), तेजस चव्हाण (कलमठ), प्राची चव्हाण (नाटळ), तनय चव्हाण (सातरल), मंथन चव्हाण (सातरल), आणि कौस्तुभ चव्हाण (नाटळ) यांचा सत्कार होणार आहे. इतर विभागीय अध्यक्षांना त्यांच्या विभागातील गुणवंत विद्यार्थ्यांची नावे लवकरच पाठवण्याचे आवाहन करण्यात आले आहे.

          याच कार्यक्रमात संघटनेच्या नवीन कार्यकारिणीची अंतिम निवड केली जाईल. तसेच, आदर्श नाभिक पुरस्कार देण्यासाठी लवकरच यादी तयार करण्याचे निर्देश देण्यात आले आहेत. माजी जिल्हाध्यक्ष अनिल अणावकर यांनी सर्व नाभिकांना संघटनात्मक मार्गदर्शन केले, तर तालुकाध्यक्ष रोशन चव्हाण यांनी सर्व विभागांना समान वागणूक देण्यावर भर दिला.

          कणकवली शहराध्यक्ष अनिल शिंदे यांनी संत सेना महाराजांच्या पुण्यतिथीच्या दिवशी अन्नदानासाठी देणगी देण्याचे आवाहन केले असून, इच्छुक व्यक्ती प्रवीण कुबल यांच्या Google Pay वर रक्कम पाठवू शकतात. गणेश चतुर्थीच्या काळात गणेश भक्तांसाठी दोन सोमवारी दुकाने उघडी ठेवण्याचा ठरावही सर्वानुमते मंजूर करण्यात आला.

          सभेमध्ये इयत्ता पाचवीच्या शिष्यवृत्ती परीक्षेत गुणवत्ता यादीत स्थान मिळवल्याबद्दल मंथन प्रकाश चव्हाण याचा विशेष सत्कार करण्यात आला. शेवटी, तालुका सरचिटणीस प्रवीण कुबल यांनी सर्वांचे आभार मानून सभेची सांगता केली.