🔴 कणकवली तालुका नाभिक संघटनेची वार्षिक सभा संपन्न; मानकरी नाभिकांचा सन्मान राखण्यासह नवीन कार्यकारिणीबाबत महत्त्वाचे निर्णय
कणकवली:
येथील माजी जिल्हाध्यक्ष तथा ज्येष्ठ नाभिक नेते अनिल अणावकर यांच्या निवासस्थानी कणकवली तालुका नाभिक संघटनेची वार्षिक सर्वसाधारण सभा मोठ्या उत्साहात संपन्न झाली. या सभेत समाजाच्या प्रगतीसाठी विविध धोरणात्मक निर्णय घेण्यात आले असून, नवीन कार्यकारिणीचा कार्यकाळ दोन वर्षांचा करण्याचा महत्त्वपूर्ण ठराव मंजूर करण्यात आला.
सभेची सुरुवात शहराध्यक्ष अनिल शिंदे यांच्या हस्ते श्री संत सेना महाराजांच्या मूर्तीला पुष्पहार अर्पण करून करण्यात आली. यावेळी उपस्थित मान्यवरांचे पुष्पगुच्छ देऊन स्वागत करण्यात आले. समाजातील दिवंगत बांधव कै. राज सुनील चव्हाण, कै. लाडोबा मेघश्याम लाड आणि कै. हरिश्चंद्र शिवराम लाड यांना भावपूर्ण श्रद्धांजली अर्पण करण्यात आली. त्यानंतर मागील सभेचे इतिवृत्त वाचून त्यास मंजुरी देण्यात आली, तसेच संत सेना महाराज पुण्यतिथी उत्सवाचा जमा-खर्च सादर करण्यात आला.
तालुकाध्यक्ष व कार्यकारिणीचा कार्यकाळ यशस्वीरित्या पूर्ण झाल्याबद्दल त्यांच्या कार्याचा गौरव करण्यात आला. नवीन कार्यकारिणी निवडीबाबत चर्चा करताना, समाजातील प्रत्येक घटकाला आणि विविध विभागांतील बांधवांना संधी मिळण्यासाठी कार्यकारिणीचा कालावधी दोन वर्षांचा असावा, असे सर्वानुमते ठरले. सभेला महिलांची उपस्थिती कमी असल्याने महिला कार्यकारिणीची निवड तूर्तास लांबणीवर टाकण्यात आली.
या सभेतील विशेष आकर्षण ठरलेला निर्णय म्हणजे 'मानकरी नाभिकांचा सन्मान'. प्रत्येक गावात परंपरेने असलेल्या मानकरी नाभिकांचा मान राखणे हे प्रत्येक कारागिराचे कर्तव्य आहे. नियमांचे उल्लंघन होऊ नये आणि ओळखीने काम करताना मानकरी नाभिकांची परवानगी व कल्पना ग्राहकांना देणे आवश्यक असल्याचे सांगून तसा ठराव एकमताने मंजूर करण्यात आला. तसेच आगामी श्री संत सेना महाराज जयंती उत्सव वैभववाडी तालुक्यात होणार असल्याने, कणकवली संघटनेतर्फे तेथे देणगी देण्याचे आणि वैयक्तिक देणगी तालुका सरचिटणीसांकडे जमा करण्याचे आवाहन करण्यात आले.
यावेळी अनिल अणावकर यांनी उपस्थितांना संघटनात्मक मार्गदर्शन केले. या सभेला जिल्हा कार्याध्यक्ष चंद्रशेखर चव्हाण, तालुकाध्यक्ष रोशन चव्हाण, माजी तालुकाध्यक्ष लक्ष्मीकांत चव्हाण, उपाध्यक्ष निलेश चव्हाण, महिला तालुकाध्यक्षा तेजस्विनी कुबल, कार्याध्यक्षा प्रिया चव्हाण, तसेच प्रशांत चव्हाण, दत्ताराम चव्हाण, संजय चव्हाण, मनोज चव्हाण, प्रकाश चव्हाण, राजेंद्र चव्हाण, लक्ष्मण चव्हाण, चंद्रकांत चव्हाण, महेश चव्हाण, नंदकिशोर चव्हाण, देऊ चव्हाण, मंगेश चव्हाण, प्रणय चव्हाण, प्रतीक्षा चव्हाण, अस्मिता अणावकर, मैथिली चव्हाण, रमेश आचरेकर, साक्षी चव्हाण, अरुण चव्हाण, गणेश चव्हाण, संतोष टिपुगडे, वैशाली चव्हाण आदी समाजबांधव मोठ्या संख्येने उपस्थित होते. सभेचे आभार प्रदर्शन तालुका सरचिटणीस प्रवीण कुबल यांनी केले.
